陳利發因天生皮膚乾燥龜裂，故有「蛇皮」綽號。他在九龍灣臨時安置區長大，為家中老二，安置區清拆後搬入彩虹邨。據其姓唐友人稱，陳初中畢業後便不斷犯事，真正自由生活的時間不超過十年，出獄後多數做散工，父母早已放棄他，當「生少個」。

被視為變態的陳利發，獄外短暫的生活離不開賭錢、女人，「佢次次衰打劫又衰埋強姦非禮，都唔明佢點解要搞成咁……其實佢有好多女朋友，大陸有，香港都有……我同佢講，你為錢打劫都已經唔好啦，搞埋女人更加天地不容、神憎鬼厭。」但每次提及強姦非禮，本來滔滔不絕的陳便低頭不語。

過幾日輸番晒

「識佢二十幾年，佢個人平時好正常。」但唐不諱言也擔心陳累及身邊人，故不敢介紹工作給他，恐防他對朋友的女性親友不利，「我老婆都好驚佢，話佢唔係人，反對我同佢來往。」但唐仍當他是朋友，常去探監，今次陳上庭所戴眼鏡亦是唐替他找來。

唐又透露，陳利發有錢就去澳門，一鋪幾萬元上落，有幾次贏了數十萬元，還分給朋友。陳去年被捕前二十多天，便用萬多元在澳門贏了百多萬，但過幾天又輸清，他說：「佢一無錢就做飛天蠄蟧入屋打劫搵錢，仲話過自己爬牆好叻㗎。」

高呼「記住探我」

在朋友眼中，陳有其另一面，「佢見到乞丐，會連聲嘆息放低十元八塊。」陳另一姓吳友人透露，早前收到陳在獄中來信，聲稱後悔所犯罪行，「佢今次坐成世，就當送殯最後一次送佢囉！」陳利發昨被押走時，向旁聽席上兩名友人高聲囑咐：「記得嚟探我呀！記得寫信畀我呀！」