醫委會原來準備就一宗涉及醫生開錯滴耳藥水畀BB仔醫眼嘅個案展開聆訊，但臨時更改安排。辯方專家證人、前醫學會會長蔡堅本來諗住「爆肚」，話公共醫療系統頻頻出事，醫委會亦應該檢控衞生署署長林秉恩同醫院聯網嘅總監，而唔係專搵私人執業醫生開刀，「麻鷹唔管，蝦雞仔」。

聽落又幾有道理噃，醫療同藥物事故人命關天，一宗都嫌多。但係本港公共醫療系統出錯當食生菜，次次都話錯誤唔應該發生，鋪鋪都話會徹查，但鑊鑊新鮮鑊鑊甘，衰完又嚟衰過。

呢嗱，當局使咗兩個億推行為幼兒補種肺炎球菌疫苗計劃，開波第一日就撞大板，有人誤將一歲以上兒童打針後服用嘅退燒藥，同用於一歲以下幼兒嘅藥水調亂派發，十幾間母嬰健康院涉嫌派錯藥，個案多達百幾宗。

咁大規模派錯藥，原來係衞生署好做唔做，將計劃「外判」畀醫療輔助隊，臨時拉伕上陣，呢班非專業人士實係雞手鴨腳啦。有家長投訴，話佢哋手法唔熟，平時私家醫生一秒就打完，但佢哋支針拮咗落去就停喺度，都唔知等乜。

叮！家陣講緊幫細路仔注射疫苗，唔係攞把錘釘釘，有兩隻手就實掂。香港醫學會質疑衞生署將醫療程序交畀非專業人士負責，做決定嘅醫生係專業失德。會長謝鴻興話：「私家診所發生事故都要向醫生追究專業責任，衞生署邊個醫生做決定，咪邊個要負責。」矛頭直指身兼醫療輔助隊總監嘅署長林秉恩。

啱吖！私家醫生有專業守則，要對自己嘅判斷同決定負責，有責任就要孭上身。公共醫療系統服務全港市民，求診病人最多，除非唔出事，一出事影響更大。照計，佢哋應該負起更多責任至啱數，點知原來係一廂情願。

公立醫院幾乎三日一小錯，每周一大鑊。唔係冇程序，而係冇監管，好明顯係管理層失職，但市民從未見過衞生高官因為咁而主動問責，更未見過有人因為犯錯要落台。

既然出幾多錯都唔使孭飛，乜鬼監管程序都廢晒，仲邊可能改善服務質素吖。嗱，近排連續爆咗幾單涉及疫苗注射嘅醜聞，先係伊利沙伯醫院幫出生嬰兒打過期卡介苗；再有幼兒補種肺炎球菌疫苗配錯藥；而將軍澳醫院又爆大鑊，為初生男嬰注射咗相當於正常分量十倍、用嚟醫癌嘅卡介苗。

叮佢個鎯鎯！淨係打針已錯到咁離譜，恐怖程度同新疆烏魯木齊嘅「針刺驚魂」有得揮，市民乜信心都冇晒啦。如果仲係問責變免責，出幾多錯都人工照，免責庸官就話快樂啫，之不過公共醫療服務就遲早玩完！