康樂及文化事務署遺失孫中山文物後，關鍵人物即該署助理署長吳志華一直保持低調，尋日古物諮詢委員會舉行會議，佢亦有出席，在場守候嘅記者本來想訪問吓佢，點知呢個助理署長一聽人叫「吳生！」同有相機對住佢，就即刻用手擋鏡頭兼遮住自己嘅面貌，唔畀人哋影佢，又對記者嘅提問充耳不聞。堂堂助理署長咁樣面對公眾，真係失禮人。
其實，尋日嘅會議都有其他議程，吳助理署長大可毋須咁迴避鏡頭，急步走入會議室，即使明知人哋問番佢有關孫中山文物嘅事，都應該坦然面對啫。佢哋個署嘅新任署長馮程淑儀，之前做過新聞處處長，睇嚟佢應該好好提點吓呢個下屬點樣面對傳媒嘞。
其實，為官多年嘅吳志華以前都經常面對傳媒，被記者影過唔少相，佢嘅廬山真面目公眾都見過㗎。本報早前披露康文署○一年籌備孫中山紀念館時，從美國購入二千七百件孫中山文物，吳志華負責到美國接收，點算時發現冇咗二十一項文物，但冇向捐贈者查問，亦冇向上級匯報，後來吳志華被指有疏忽，已接受處分，唔通因為呢件事令佢變得咁驚鏡頭﹖