金融海嘯發生一周年後，好多國家都開始研究舊年推出嘅紓緩經濟措施應唔應該撤銷，富貴黨副主席方剛同一班零售業界舊年開始組齊抗金融海嘯大聯盟，並喺今年四月推出消費券刺激經濟，一年過去，成效點呢？方剛尋日話，一般舖頭回收嘅消費券（即市民憑券消費可享優惠）比率只有一成，佢間時裝公司就有兩成。使用率咁低，方剛同富貴黨並冇氣餒，尋日仲發起第五波行動再接再厲。
方剛、張宇人同周梁淑怡尋日趁○九年九月九號，取其「長長久久」好意頭，喺時代廣場送月餅兼派發第五波消費券，呢個計劃由四月底開始，延續到十二月，總共會推出七波行動刺激消費，譬如趁母親節、父親節等派發消費券刺激市民消費。佢哋除咗喺本地派之外，仲會喺陸路邊境派發畀內地來港旅客。
雖然係咁，過去幾個月消費券嘅使用率始終冇大幅進步，不過，業界都認為，喺經濟唔好、市民人人㩒住荷包嘅時候，呢個計劃總好過冇。方剛尋日話，會將個計劃推行到底，計埋尋日舉行嘅第五波行動，大聯盟總共派出超過十萬本消費券，即使只計一成回收率，都有一萬人次曾經使用消費券，對經濟都算有刺激。