港大醫學院前院長林兆鑫被判監二十五個月，醫療界同教育界都感到震動，私家症嘅危機亦由港大吹到中大。中大醫學院院長霍泰輝話，中大一向對私家症有規定，至於林兆鑫入獄一事，佢就好感嘆咁話，作為醫生，搞到要坐監真係好可惜！
霍泰輝話，中大一早限制咗轄下醫生睇私家症嘅時間，唔理班醫生教授去邊度睇私家症，即使由新界過對面海睇症都冇問題，但係唔可以超時，唔好畀人話掛住搵銀唔理醫管局病人就得嘞。到依家為止，中大私家症方面並冇乜嘢問題，似乎個規矩都好有成效。
講到近日公立醫院醫療事故多籮籮，有關嬰兒嘅問題尤其多，兒科出身嘅霍泰輝就話，十年前已經爭取搵專人睇實BB房個門口，父母出入探BB都要對身份證，確保毫無還擊之力嘅BB唔會畀人抱走，甚至畀人傷害。
佢話每一單醫療事故發生之後都要花好多人力物力去調查，所花嘅資源分分鐘貴過請一個助理看守住BB房。