本港名人圈近排有股撲飛上京熱。據悉，三十六名港區人大上禮拜終於收到中聯辦嘅訪京預告信，溫馨提示九月三十號下晝兩點前抵達北京，有啲仲收到唔止一個內地部門邀請。不過，有啲政商界人士仍然望穿秋水都未收到消息，個心七上八落，半天吊好唔踏實，事關政界重量級人馬都上晒京，如果十．一前後嗰兩日畀人見到喺香港現身，都咪話唔尷尬。
十．一臨近，內地唔同系統嘅單位都會廣邀友好，好似人大、政協、僑聯、工商聯、婦聯、全國總工會、衞生部等不同機構，日內陸續向香港各界人士發信，但按各人嘅政治身份有唔同待遇，譬如港區人大，就肯定獲安排喺十月一號朝早出席閱兵儀式，港區政協據聞今年亦獲相同待遇。而僑聯、婦聯同全國總工會等賓客，一般無緣睇閱兵，有啲就冇得出席國宴。
僧多粥少下，好多人撲飛變撲空，有啲人爭崩頭，有啲人就唔止一飛在手，分身無術。估唔到一場盛事，反而變成喺北京有幾吃得開嘅證明。