乒乓波係國技，香港名人圈中都有好多愛好者，前經濟發展及勞工局局長葉澍堃（Stephen）早前就同富豪飯堂鏞記老闆甘健成、中華廠商聯合會會長尹德勝同廠商會行政總裁梁世華等，喺跑馬地會所打乒乓波，Stephen仲重提舊事，話三十年前已同一樣係政務官出身嘅梁世華交過手，今次半甲子後重逢，真係要鬥一番！
Stephen先同甘老闆湊成一隊，尹會長就同梁世華組成另一隊，尹德勝頻頻起板抽擊攞分，一睇就知係實力派。不過，聲稱拜過北京教練為師嘅Stephen都唔弱，同甘老闆屢以快速殺波還以顏色，甘老闆仲頻頻開波直接得分，結果佢哋以直落三比零勝出。賽後Stephen同梁世華一邊握手一邊「示威」話：「估唔到三十年後終於威番次囉！」原來兩人當年曾同被派去英國牛津大學受訓一年，閒來無事就打波自娛，但Stephen輸足一年。
稍後輪到Stephen同梁世華單打對決，梁世華主動提出唔計分免傷和氣，最後Stephen被殺個措手不及。之後幾個球腳約埋去食晚飯，生活認真逍遙。