本文重點
悠長暑假雖已結束，立法會一班議員卻要十月先開始新一年度工作，立法會內務委員會主席劉健儀同秘事長吳文華喺諮詢全體議員後，就決定趁議員開工前推出三項新招，嚴打議員過去同十八區區議會交流時慣性放飛機嘅陋習，兩個女將咁樣三令五申，都係唔想尊貴嘅立法會議員借禮拜三開大會或續會嘅藉口放人飛機。不過，呢啲措施並冇任何罰則，如果議員唔生性照樣甩底，講到尾，都係議員自律同紀律嘅問題啫！
縮短審議法案時間
立法會議員同十八個區議會一向有定期會面，過去一年就多次爆出議員集體遲到玩失蹤嘅醜聞，引起多區區議員不滿，其中一次係早前就預算案進行三讀投票，會議開到三更半夜，偏偏第二朝立法會議員原本約咗兩個區議員見面，結果飛機滿天飛，區議會方面梗係唔高興啦。
為免類似鬧劇重演，秘書處建議如果晨早定咗喺禮拜四朝早同區議會會面，平日喺上晝九點鐘開會嘅立法會大會續會，就會順延至下晝兩點半舉行，並獲得大部分議員同意，十月復會後就會開始實施。最受有關安排影響嘅，應該算係政府，因為咁會變相令立法會少咗五粒半鐘審議法案，一係會議就愈拖愈長。
不過，避得撞會期，又點避議員各有私務呢？秘書處提出另外兩招，一係增加每次獲委派出席會面嘅議員數目，由十四人增至十九人，希望有多啲議員供選擇；其次係提醒各個委員會喺編排會期時，盡量避免同區議會會面撞期，希望可以提高班議員嘅整體出席率。其實有關會面嘅法定人數只需五人，理應唔係好難達到，唔明白點解要勞師動眾搞咁多嘢。或者尊貴嘅立法會議員真係太忙，忙啲乜就要佢哋自己向公眾交代喇。