小白觀點

全球獨家新奇樂園

香港嘅主題公園少之又少，嚟嚟去去得扮嘢文公園同老鼠公園，悶到吖。唔講唔知，其實特區政府整整埋埋好多主題公園，只不過一直懶宣傳。

當局為咗推廣呢個主題公園，應該搵人拍番套恐怖版《朱古力獎門人》，由尊尼．特普做康文署公園主人，帶小市民暢遊園內名勝：「好歡迎大家參觀呢個公園，睇吓嗰邊個魚池，幾條巨型怪魚拖咗兩個細路仔落水噬緊，幾緊張呀！呢嗱，大家望吓四點位，係咪見到兩個長者嘔緊泡呢，哦，佢哋唔係喺度刷牙，只係摘咗啲毒菇食啫！」咁新奇古怪嘅玩意，包保全世界都冇，而且費用全免，唔會年年加價趕客，你話邊度搵吖！

網址：www.sunsiupak.blogspot.com

網友觀點......

泠月乂

政府應該搞個野生世界，起碼啲遊客又有多一個選擇，唔使嚟嚟去去都係去嗰幾個主題公園啦。

一切很美只因有你

公園係啲細路仔經常去嘅地方，如果佢哋摘菇食而出事，咁到時邊個要負責呢？

小肥

捉到鹿唔識脫角，開多啲職位囉，做生態旅遊囉，全部改名做「煲呔曾農場」嘛。

Leicamania

好易啫，咪將啲毒菇餵怪魚囉，一物治一物。

阿豪觀點

鱷不群大戰毒菇求敗

唔少有錢人都鍾意反璞歸真，去非洲參加Safari狩獵旅行團，見吓平時冇機會見到嘅動植物。雖然呢味嘢，作為冇錢人嘅你同我一定冇份，但係其實我哋唔使捨近求遠嘅，去康文署公園都得啦！嗱！有鱷大俠「鱷不群」，又有「毒菇求敗」，夠晒熱鬧同刺激呀！

好多人聽到話公園有福鱷同毒菇都好震驚，但係大家又知唔知，本地某電視台一個以金魚做主角嘅節目，其實都有唔少Fans，側聞有觀眾仲幫捧開場嗰條魚改名添！福鱷喺水池出現、毒菇喺公園遍地生，點都合理過金魚喺電視機裏面游嚟游去啩！計我話，電視台將佢哋個生態節目移師去各康文署公園直播，定可砌低對手！

網址：www.lukchiho.blogspot.com

網友觀點......

Carman

公公婆婆可能會摘番屋企食㗎嘛，政府快啲搵人清理，唔好搞到出事先做嘢！

Johnson Lo

康文署啲人做乜唔走去清走啲菇呀？以為自己玩緊超級瑪利奧，食咗啲菇會升呢呀？

匿名

從來都冇人話可以亂摘嘢食㗎啦，唔通公園啲嘢可以隨便拎走？

匿名

好簡單，去公園拎毒菇返屋企種，拎福鱷返屋企養，咁咪一天都光晒囉。

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。