呢嗱，記者喺幾個康文署轄下嘅公園發現生滿怪菇，好似話荔枝角公園草地，長滿咗幾十個拳頭咁大嘅白色怪菇，最大一個有BB仔個頭咁大，睇見都毛管戙。最牙煙嘅係，好多公園草地同行人路連住，冇任何欄杆隔住，如果有小朋友唔知，見怪菇咁得意放入口，咁就大件事咯。

中文大學生物系專家表示呢種菇嘅學名叫龜裂禿馬勃，屬於本港常見二十二種馬勃菇之一。咁可唔可以將佢攞入廚房炒番幾味呢？如果唔怕死咪即管試吓囉，專家話食咗落肚，六個鐘內會發病，出現嘔吐以及肚痛呢啲食物中毒徵狀，後果可大可小。

香港中毒諮詢中心資料顯示，近年市民因進食菇類中毒個案大幅飆升。○五年只得一宗咁大把，但今年頭八個月，已經有多達八宗，平均每月有一宗，當中大部分個案係喺本地公園或郊野公園摘咗啲野菇返屋企煮嚟食，真係唔到你唔驚呀。

康文署發言人話冇公園發現菇類嘅統計數字，但如果發現公園範圍有菇類，會盡快派人清理。呃鬼咩，專家話呢啲毒菇生到咁大，估計已生長咗兩、三個星期咁耐，康文署職員連咁大個菇都見唔到，唔通一個二個都發雞盲？

查實邊度係吖，一句講晒，就係康文署無王管，成班友仔闊佬懶理就真，既唔清理，又唔搵欄圍住，結果要勞煩晨運客做糾察，勸其他長者路邊毒菇勿亂採。既然係咁咯，當局不如炒晒班康文署職員，請呢啲熱心市民管理公園好過啦！

話時話，要數公園嘅危機，何止得咁少吖。日前多個公園池塘發現福鱷，雖然唔係真鱷，但條條兇神惡煞，尖牙利齒，睇個樣都夠得人驚。家長同小朋友喺度放船仔，容乜易畀惡魚噬一口o架！

講到底，一日都係署方翹埋手唔做嘢，完全冇採取措施防範市民將惡魚放生！唔講唔知，有部分惡魚原來係池塘長期住客，生活咗超過五年都有，但負責清洗池塘以及管理嘅康文署人員竟然唔知有惡魚，真係懵到上心口。

除咗公園之外，同樣係康文署管嘅公眾泳池都唔好得幾多。泳池有糞便已經唔係乜嘢新奇事，雖然未見有惡魚，但就試過老鼠同泳客暢泳。不過千祈唔好因此嚇暈呀，你知啦，救生員人手嚴重不足，有次唔夠人求其搵個收銀處職員頂硬上o架咋。

叮佢個鎯鎯，康文署署長馮程淑儀新官上任無幾耐，已經咁多災多難，都唔知係佢當黑，定係小市民唔好彩。不過正所謂能者居之，如果馮程淑儀署長覺得管唔掂，不如快啲執包袱走人，否則再有乜嘢甩漏，太一叮一定叮爆佢嘅鎯鎯！