護士比病人更似病人

以前做醫生真係高人一等，不過今時唔同往日囉，前線醫生做到隻積咁，據講家陣每日有五百個醫生要連續做三十個鐘，想唔割錯乳房輸錯血都幾難啦！

小白老弟講個恐怖經歷畀大家知吖，有次不幸入咗某公立醫院住咗幾日，病房得嗰幾個醫生護士巡，其中有個護士遠睇幾靚，但埋嚟打針時，近睇嚇破膽，佢個黑眼圈仲圓過Speedmaster手錶個圈，眼白紅筋好似成窩紅蟲咁，佢似病人多過瞓喺度嘅任何一個人。

鬼咩，晨早量血壓又係佢，晏晝派藥又見佢，三更半夜推醒你打針嗰個亦都係佢。好奇問佢係咪三胞胎喺同一間醫院做，點知護士姐姐兩眼一反就暈低咗。

網址：www.sunsiupak.blogspot.com

冇穿冇爛出院要還神

「做做冇停手，梗有食飯嘅時候……」記得呢個經典廣告裏面，唱呢支歌仔嘅係一班地盤工友。時移勢易，呢首歌嘅MV相信都要與時並進，由一班手執聽筒嘅醫生嚟個大合唱。但悲哀嘅係，醫生「做做冇停手」唔係因為經濟好咗，而係因為醫管局肥上瘦下，管理層分分鐘仲多過落手落腳做嘢嘅前線醫生！

十個煲得七個蓋，有乜辦法唔成日割錯器官輸錯血吖，病人冇穿冇爛由公院返出嚟直頭要還神！話時話，你哋班前線醫生爭取增加人手，豪伯我瞓身支持，但係千祈咪借頭借路想加薪呀，除非你同我講，月薪加到一百萬，你哋可以一日做二十六個鐘頭而唔會出錯啦！

網址：www.lukchiho.blogspot.com

網友觀點......

我心水珩

我覺得醫管局應一視同仁，如果唔係，我驚啲前線醫生會走去學人罷工，咁到時受苦嘅就係市民。

Henry

前線醫生日做夜做，人手又唔夠，我哋交條命畀醫生，但醫生得半條人命，點搞呀！

傻榮

根本成個醫療系統都有問題，香港人信自己好過啦，冇得救！

阿山

醫管局高層坐冷氣房腳印印，做錯嘢永冇孭鑊，前線就做到趴晒地，醫療水準點會高吖。

尖子

冇嘢呀？入得公立醫院仲預冇穿冇爛出番嚟？

匿名

如果啲高官同仔女有病，都係入公立醫院醫，咁我就有信心嘞！

匿名

不如醫生齊齊減薪，請多幾個醫生啦，犧牲一點點，人工少一點，斷估對生活唔會有咩影響啩。

匿名

我睇唔過眼有人「憎人富貴」，工作性質唔同，冇得比較啦。