離開咗醫管局幾年嘅骨科名醫高永文仍不忘投桃報李，尋日以潮州商會常務會董身份喺午餐會主講，仲請嚟醫管局主席胡定旭分享從政同醫院管理心得，多名醫管局高層畀面以舊同事身份撐場。
高醫生介紹肥胡出場時趁機感謝呢個「救命恩人」，話兩年前喺雲南參加長征時腦下垂腫瘤突然病發，多得肥胡瞓身幫佢撲機票返港就醫，先至執番條命。
肥胡就由政治講到豬流感，仲主動提起公共醫療醫生協會會長何栢良喺電台批評醫管局高層唔了解前線狀況，話工會代表發言佢一定會尊重，仲舉例有次行經將軍澳醫院，遇見一名女士因夾親手指入急症室求診，點知等咗三粒鐘都未輪到佢，大發雷霆話要轉去私家醫院，肥胡聽見即時「順應民意」，提出護送對方一程去私家醫院，但被對方婉拒。肥胡咁講法，變相話畀大家聽，佢經常微服出巡，唔使成棚人跟，又叫大家咪濫用急症室。