立法會超豪華嘅東歐三國外訪團尋日開記招講吓行程，八名團員之中，霍震霆同謝偉俊都冇喺記招現身，團長劉慧卿仲爆料話霍公子未必會去足全程，有可能提早閃人，遲吓佢可能喺內會提出，規定將來參加外訪嘅議員唔能夠早走。
今次外訪嘅係立法會議會聯絡小組，九月十三號出發，去到二十三號，全程只有一日可以自由活動，而個團總共使咗四十九萬二千蚊，單係機票都差不多二十八萬。
卿姐話理解市民對公帑好緊張，不過今次個團並冇超支喎。之不過佢都認同參加得個團，就好應該去足全程，但依家冇明文規定議員唔可以早走，所以就算今次霍公子可能會提早鬆人，都唔能夠揪秤佢咁話，而將來就應該講明，去得外訪嘅議員唔應該早走囉！其實呢個規矩老早就應該有啦，唔係下下都提早走人，仲去嚟做乜？