點知公文袋前日高調召開記者會，公開提出比「五區總辭」更加激進嘅方案，兼且黑箱作業做咗份五區總辭名單，當中人選包括九龍西嘅民協馮檢基（KK）。

泛民自製內訌

事前毫不知情嘅KK，事後炮轟公文袋嘅做法冇誠意、唔認真兼唔民主，佢話嬲嘅並非冇啦啦畀人點名辭職，而係不滿公文袋未經任何內部諮詢同討論，就單方面提出雙辭方案，尤其公文袋之前先喺飯盒會狠批過激進民主派玩屈機，依家自己又玩埋一份，明顯係有口話人冇口話自己。佢慨嘆政改方案仲未開始諮詢，泛民就已經紛紛自製內訌、互相廝殺，將來正式諮詢想唔滿地鮮血、屍橫遍野都幾難。

公文袋就解釋前日舉行集思會敲定方案後，擔心啲傳媒會亂咁引述佢哋嘅建議，引起更多誤解，不如自己公布好過，喺召開記者會前亦有致電各黨派打底，可惜始終都唔夠個別傳媒快手，搶先過佢哋打畀KK問回應。尋日佢哋已再向民協主席廖成利解釋補鑊，但似乎都平息唔到KK嘅怒火。