自從退下議員火線後，嫻姐喺政壇都靜咗好多，就因為泛民建議總辭，一時間又令佢熱爆喎。尋日喺金鐘撞到佢，佢承認好多傳媒搵過佢，但佢一概唔發表意見。

據聞嫻姐私底下對有關建議有好大保留，一來佢年紀已經有番咁上下，二來呢場補選肯定係一場意識形態之爭，同個別候選人嘅個人實力未必有直接關係。嫻姐就算贏咗，功勞亦唔會歸佢，一旦輸咗就更加會畀人話衰收尾，為自己嘅從政生涯增添一場敗仗。嫻姐對有關問題三緘其口，唔通有關傳聞係真嘅？

對於工聯會今屆四名立法會議員，自覺形象唔夠上屆由嫻姐領導嘅工聯會「福祿壽」咁突出，計劃加強分工同重建形象，嫻姐就大表贊同。咁會唔會過番幾招畀啲後輩呢？佢話不在其位不謀其政，亦唔想佢哋跟住前人嘅影子走，所以唔會畀好多意見。用到「前人」嚟形容自己，睇嚟嫻姐真係退意已決，唔會輕易重披戰袍噃。