拔萃男書院為慶祝建校一百四十周年，特別同由校友王守業做主席嘅大新銀行合作，推出以男拔做主題嘅白金卡。身兼校董會主席嘅立法會議員「肥仔張」張宇人尋日出席有關宣傳活動時話，雖然佢依家已經一屋信用卡，但為咗支持母校，一定會申請番張。
肥仔張話六九年喺美國讀大學一年班時，已獲發人生第一張信用卡，當時啲銀行嘅發卡準則比依家嚴好多，唔係個個大學生都攞到。佢仲記得頭一年佢張卡嘅最高簽帳額為一百美元，喺當年嚟講絕對唔係小數目，夠買五百個漢堡包，隔一年仲倍增至二百美元，證明有關銀行對佢好有信心。
校長張灼祥估計有過萬名校友、學生家長同教職員合資格申請呢張信用卡，但未夠十八歲嘅學生就冇份，唔擔心會教壞啲學生過度消費。
唔講唔知，著名歌手林子祥原來係張校長嘅同班同學，佢踢爆林子祥讀書時已好怕醜，同學都唔知佢原來係唱家班，反而當年又唱詩歌班，又學過拉小提琴同大提琴嘅張校長，畢業後就同音樂無緣。