上個禮拜四可謂係港大嘅「黑色星期四」，法院一日四判，事後港大校長徐立之都嘆句唔好彩，亦都唔想多提。唔係咁又可以點樣呢？

關鍵時刻秉持核心價值

唔少校友叫徐校長做番啲嘢，保住港大百年老店個金漆招牌，但幾日嚟校方都冇乜聲氣，直到尋日凌晨三點，徐校長突然以港大校訓「明德格物」為題，寫咗封午夜電郵畀學生、教職員同校友，主動提到呢幾單案，話自己心情同大家一樣沉重，令佢反思港大嘅使命。

咪以為徐校長唔上心，淨係睇佢午夜夢迴仲要發電郵，就知佢為呢幾單判刑搞到冇覺好瞓啦！有乜好計先？其實都冇乜突破性或驚嚇性。

徐校長語重心長咁話港大立校以嚟，社會一直好有期待、信任同尊敬，對港大嚴格監督，其實係反映公眾對港大嘅熱切期望，所以港大必須繼續努力，以優越學術素質同研究貢獻，報答社會期望，所有港大人更加唔可以忘記，港大嘅成功，都在於崇高嘅道德同誠信。佢話港大當前任重而道遠，既要發展新課程、起新校舍以及喺學術領域衝刺，仲要喺關鍵時刻互相警醒，秉持大學嘅核心價值。

相信大家都意會到徐校長想講乜嘢，尤其嗰句「所有港大人更加唔可以忘記，港大嘅成功，都在於崇高嘅道德同誠信」，因為近期港大嗰幾單判刑就涉及私德唔好同冇誠信。

其實所謂「樹大有枯枝」，都冇得話怪邊個，但今次搞成咁，徐校長都有好大壓力，否則就唔會夜麻麻寫電郵穩定港大人嘅心啦！