日前灣仔告士打道繁忙時間爆水管，搞到交通大癱瘓，返工市民狼狽不堪。水務署署長馬利德尋日上電台解畫，將責任全部歸咎供水系統老化。佢可能想加多兩錢肉緊，爆響口話舊年因為水管滲漏損失嘅食水，差唔多佔全年供水量嘅兩成二，七億公帑係咁漏走咗。

馬利德話，目前全港有七千八百公里水管，其中三千公里比較殘舊嘅已經納入維修計劃，相信完成復修之後，食水滲漏率「有機會」降到一成半左右。佢仲話當局會加快更換水管，並且將完成計劃年期由二十年縮短到十五年。

叮！依家講緊更換水管，唔係探索火星噃，使唔使十五年咁耐呀？唔該馬署長攞部計數機撳吓，一年唔見七個億，十五年唔見過百億，仲未計成本上漲因素，呢條數點計先？水管長期滲漏，唔止浪費納稅人血汗錢，仲浪費愈來愈珍貴嘅水資源，你班官知唔知乜叫做環保o架？

水管老化唔係今時今日至有，依家用緊嘅鐵水管使用壽命得二十五年，全港有四成半水管用咗三十年有多，證明問題一早已經存在。其實更換水管一啲都唔難，弊在水務署平時闊佬懶理，拖得就拖，唔爆大鑊都唔做嘢。

好似告士打道出事水管咁，位處港島交通大動脈，用咗二十幾年，過去曾經多次爆裂。當局雖然將有關水管列入維修計劃，不過做嘢慢九拍，出事前兩周，水務署做過探測都話冇問題，但跟手就爆，好明顯係平時做嘢得過且過啦。

呢次爆鑊勁嘅，水務署即刻決定將明年初更換出事地點水管嘅計劃提前，仲將工程壓縮到半年搞掂添。所以話，加快更換水管唔係做唔到，而係水務署唔肯做啫。鑊鑊都係出咗事至知衰，唔怪得香港隨街都係「噴泉」啦。

馬利德仲話，會推出水效益標籤計劃，開頭會將花灑頭出水量分四級，加上標籤；稍後會將計劃擴展到水喉同洗衣機，希望到二○三○年全面實施，到時可以慳番大約一成用水。

叮！透過水效益標籤計劃慳水，冇人會反對，至怕又係整色整水，有姿勢冇實際。其實使乜搞咁多嘢吖，依家一年漏足兩成食水有多，水務署搞幾多個標籤計劃都慳唔番喇，不如快快趣趣換咗嗰啲甩甩漏漏嘅水管好過。

多年前審計署曾經踢爆，水務署購買東江水冇計清楚，要將買番嚟多餘嘅水倒入大海，五年間嘥咗十七億公帑。仲有，水務署○四年用二億元更換嘅服務系統錯漏百出，有八十一萬個客戶地址出錯，要額外使多八百萬請臨時工處理積壓個案。明知漏水都唔去執漏，水務署不如改名叫「失禁署」啦。叮！