小白觀點

同「鱷」唔同命死得冤枉

康文署公園魚池發現有福鱷出沒，畀外判臨時清潔工雞手鴨腳捉走晒，場面極之悲壯。福鱷話就話有個「鱷」字，可惜唔係真鱷魚，命運同山背河嗰條小灣鱷差得遠。記得當年條鱷魚仔牽動全港市民心靈，怕佢冇嘢食餓親，又驚鱷魚先生出手重得滯整瓜佢，勞師動眾幫佢改咗個名叫「貝貝」，仲有五星級新環境畀佢入住添。

對比起貝貝嘅善良、可愛、有上進心，福鱷硬食「窮兇極惡」嘅罪名，真係夠晒冤枉呀。最弊係荃灣發現嗰條福鱷，仲死得不明不白添！冇計啦，鬼叫佢條命生得唔好，有濕地公園、海洋公園咁多個地方唔去，偏偏去正德華公園，唉，聽個名就知，近排一定冇運行啦。

網友觀點......

泠月乂

鬼叫條魚畀人改名叫做福「鱷」，啲人嘅中文水平又咁低，真係死得好冤枉！

貝貝

呢啲咪叫同鱷唔同命囉，一句沒有保育價值，條命仔就凍過水，認命啦！

chris

睇條福鱷嘴尖尖幾得意，見佢被人捉住掙扎跳桶幾苦命，依家仲畀人冠名兇鱷，真係慘情！

大榮

實凶多吉少啦，人道毀滅，跟住就會出來講多條福鱷唔適應新環境瓜晒，或者費事提，慘！

cyrus

其實喺鬧市水塘養福鱷有咩唔妥呢？啲人行公園又可以睇吓魚——點解一定要捉走佢呢？

匿名

命有貴賤，福鱷個樣衰衰咁，惟有怨個天生得佢唔靚仔！

Rex Ho

唓，咁計，貝貝又有幾靚女呀？怪只能怪佢唔識得同捉佢嘅人鬥智鬥力。

Johnson Lo

啲人亂咁放生，真係好心做壞事呀！

阿豪觀點

政府專虐畜咪亂放生

康文署多個公園驚現「鱷蹤」！好消息係，講緊嘅「福鱷」又名雀鱔，並唔係真正嘅鱷魚，大家下次一家大細行公園，唔使搵埋番禺嘅「鱷魚釗」護駕。但壞消息就係，福鱷係淡水界十大惡魚之一，雖然唔會主動襲擊人類，但係誤以為遇襲時會突然失常咬人自衞，到時連鱷魚釗都未必幫到你！

唉，其實啲人將福鱷放生，又有冇諗過對方嘅感受、有冇諗過佢哋適唔適應呢？你知啦，動植物公園裏面嘅猩猩「達圖」，康文署都管唔掂，至於漁護署虐待動物一樣「戰績彪炳」，曾經創出焗死過千條水律蛇嘅驕人紀錄。計我話，直頭應該將亂放動物喺政府場地嘅人，以虐畜罪名檢控呀！