亞洲排首位嘅香港大學呢輪真係冇運行，一日之內爆幾宗法庭醜聞，校長徐立之嘆唔好彩之餘，好多港大舊生都心有戚戚，港大校友梁智鴻醫生又點睇呢？金刀梁氣定神閒咁話︰「港大係香港第一間大學，依家有咁多學生讀緊，又有咁多人畢業出嚟做事，可能有良莠不齊啦！」
講到師弟林兆鑫貪出禍，金刀梁覺得未嘗唔係反面教材，事關每件唔好嘅事都會有好嘅一面，佢讚林係一個人才，相信對方出番嚟之後，會繼續對醫學有貢獻。佢仲話同林兆鑫識咗好耐，大家差五屆畢業，又一齊共事過，完全無同對方劃清界線！
佢仲為徐校長抱不平，話徐校長做科研好成功，依家要做埋行政同教育，有啲嘥料，對於徐校長被指金錢掛帥，金刀梁話︰「以前香港得一間大學，政府放好多資源落去培育人才，但依家就唔同晒，好多嘢都要開放，所以都好困難。」