城中一班名人尋日應國家教育部邀請北上訪問、巡察學校。個團每年九月出發，原本係由TVB揸弗人「六叔」邵逸夫帶隊，但六叔已逾百歲高齡，所以今年改由「六嬸」方逸華搖旗帶隊，八日行程分別到天津、吉林長白山、山東曲阜、安徽黃山等地，一行四十多人好壯觀。
不過，尋日見六嬸右手包紮住，明顯帶傷北上，佢話，早幾日喺屋企唔小心撞親右手手（月爭）搞到甩骹，但佢笑笑口話：「完全唔使擔心，因為隨團有好多大國手喺度，有乜事實有醫生幫手。」例如有外科醫生李國章（阿瑟王）、眼科嘅何志平、被譽為「沙士英雄」嘅內窺鏡聖手鍾尚志。阿瑟王一如既往帶埋太太一齊隨團晒恩愛，肥平就只係一支公。場中仲有深居簡出嘅前高院法官李福善及太太，問到李官點睇姪仔、首席大法官李國能提早退休？李福善一貫長輩語氣話：「佢大個仔喇，退休無問題，尊重佢嘅決定！」