機場好多名人出沒，好自然成為熱門採訪地。尋日，煲呔曾喺多名保鏢護送下來到機場大樓，平時出境都係用貴賓室嘅佢，可能慣咗冇人埋到身，所以喺機場大樓見到傳媒時竟然面色一黑。
煲呔曾太太鮑笑薇參加咗一個外訪團，唔知佢係晒恩愛，定係順便為個團送行而去機場大樓送機，佢哋一行人又係保鏢，又係工作人員，一入大堂就好矚目，本嚟煲呔曾同太太十指緊扣咁行緊，見到傳媒就即刻面黑，曾太亦立即彈開，同丈夫行到離行離列，反應仲奇怪過偷情被撞破嘅人。
不過，呢個面燶表情維持只係好短時間，待傳媒舉起相機後，兩個人又即刻擠出笑容，勉強緩和面部表情，咁小嘅事都要變嚟變去，使唔使呀？
