唔少港人都鍾意飛過日本浸溫泉，「經濟動力」4L之一嘅林健鋒（Jeffrey）一家三口，啱啱去完日本自駕遊兼浸溫泉，佢仲透露，喺日本熱湯勝地登別地獄谷一晚浸足七款唔同功效嘅溫泉，由美膚、健腎、利血管都有，難怪返到香港咁生猛啦。
經濟動力一眾日前喺中環政府總部現身，Jeffrey神采飛揚，佢話啱啱同太太、兒子三人行，以自駕遊方式遊歷北海道登別、洞爺湖、小樽同札幌，Jeffrey仲同囝囝分工，一人揸一日車，佢哋嘅首站係登別，香港人對呢個以溫泉馳名嘅地方應該唔會感到陌生。
位於北海道西南部嘅登別係日本數一數二嘅溫泉勝地，其中又以地獄谷最聞名，火山氣體從灰黃色嘅岩石表面噴出，空氣瀰漫濃烈嘅硫磺異味，加上水滾沸騰起泡嘅景象，成為地獄谷嘅名稱由來。Jeffrey話，香港天氣咁熱，起程時都有啲驚對住啲溫泉得物無所用，點知喺登別留宿當晚，天氣驟降至十度左右，凍到佢騰騰震，所以佢唔理三七廿一，全部試勻晒七款溫泉，仲話塊面真係滑咗喎。