06/09/2009

播放本新聞相關短片

政情:小霍High得太早

年尾舉行嘅東亞運動會已經開始售賣門券一個禮拜,跳水、羽毛球甚至武術等門票喺頭兩日已經賣晒,東亞運籌委會主席兼立法會體育界代表霍震霆尋日好開心話,東亞運門券銷情理想,一副可以開香檳嘅樣。但有了解內情嘅人話,東亞運售出嘅門券只佔公開發售票量兩成多啲,隨住受歡迎嘅賣晒,撲飛熱潮都告終,小霍高興得咁早,似乎都同政府財金高官一樣犯咗過早睇好嘅錯。

小霍尋日出席一個活動時被問到東亞運體育賽事嘅售票情況,佢話,東亞運開幕禮及各個項目的門票銷情理想,亦睇好未來一段時間嘅賣飛情況。不過,佢嘅睇好言論同實情就有一啲距離,事關東亞運發言人接受我哋查詢時明言,截至周四晚嘅統計,賣出嘅門票係五萬八千張,而總票數高達二十一萬張,目前嘅銷情屬「OK」。

21萬張飛 隨時逾半水分

據講,家吓跳水、游水、羽毛球、保齡球等項目嘅門券都售罄。不過,呢批門券賣晒,亦都代表東亞運嘅吸引力「係咁先」,事關賣晒飛嘅運動項目都屬於受歡迎、可能有星級運動員現身嘅項目,香港人鍾意追星,有幾多真心捧運動真係好難講,其他十幾、二十項運動已有乏人問津嘅現象,睇怕運動會舉行時,場館都會出現一啲好熱鬧、一啲靜英英嘅局面。

有立法會議員更話,東亞運嘅門票唔可以單睇公開賣飛,事關呢啲飛只有二十一萬張,但贊助商馬會手頭仲有十二萬張,另外仲有政府預留畀相關贊助團體嘅飛,即係話,好多飛係免費派或免費畀團體嚟充撐場面嘅,市民真正掏荷包、用錢支持東亞運嘅比率可能低到入場券嘅幾個百分點,想用門票收益補貼籌辦賽事嘅開支,真係有排都達唔到標,咁講嘅話,小霍話銷情理想真係好有水分喎。