政府高官平時開口藍天、埋口白雲,照計一定扮晒叉燒,齊齊響應「無車日」嘞啩?咁諗真係高估咗佢哋嘞。到目前為止,表態支持嘅高官得環境局局長邱騰華一支公。唔知其他高官究竟係烏吓烏吓,唔知道有件咁嘅事吖,定係側側膊詐傻扮懵呢?睇嚟都係後者居多喇。
叮!一年三百六十五日,一日唔坐車以示支持環保,有幾辛苦,有幾難啊?再講,歐盟九年前就將每年呢一日定為「無車日」,內地前年已經有百幾個城市參與,舊年更加有四十個國家約二千個城市響應。香港已經遠遠落後,高官仲無動於衷玩縮沙,試問環保誠意去晒邊?
講開高官座駕,當堂火都嚟埋。原來依家政府高層坐嘅全部係狂食油房車,引擎容量介乎三千到五千cc。就算唔揸車嘅人都知,架車cc愈高,耗油量同廢氣排放量愈多,如果千五cc車輛每公里排放嘅二氧化碳為一個單位,三千cc車輛嘅排放量就高出一倍,而五千cc車輛嘅排放量更加高出四倍。
專家話,按照本港路面情況,用二千cc嘅車已經好夠用。港島塞車出晒名,多數高官返工同居住都喺嗰區,坐住架「食油老虎」行吓塞吓,一日唔知製造出幾多廢氣,難怪中環同金鐘一帶空氣污染成日爆燈啦。
叮!政府高官愈來愈鍾意擺款,十足內地暴發戶咁,以為架車馬力夠至顯得自己官威夠。發起「無車日」嘅環保組織兩年前已經要求當局全盤考慮本港氣候變化問題,包括檢討高官用車,但一直得唔到積極回應。
其實,好多外國政要都改用細車啦。美國總統奧巴馬為履行支持汽車新能源發展嘅承諾,主動改用混合動力版房車做總統座駕。人哋話做就做,港府高官就得把口,叫市民點信佢哋吖?
政府搞環保有幾多誠意?嗱,環保電動車係未來大趨勢,連股神巴菲特都飛去中國投資電動車車廠。但香港高官淨係識攞電動車做環保騷,邱騰華仲親自扮埋「電車男」,揸架電動車去立法會停車場做柴可夫添。不過,啱啱離任嘅科大校長朱經武早排踢爆,理工大學研發出一款效能不俗嘅電動車,價錢唔貴,維修費又低,但遲遲都唔見政府帶頭推動喺本港大量生產。
成班高官連本港首個「無車日」都冇心支持,又唔肯以身作則行多兩步,歎少陣冷氣,淨係識用停車熄匙呢啲屎橋嚟擾民,仲講乜鬼環保吖。如果真係有心嘅,政府收埋咁多膠袋稅,睇怕都夠高官一人換架電動車嘞啩?再唔係,不如踩單車返工吖?叮!