小白觀點
「陰宅八萬五」唔使爭
青松仙苑推售一千個骨灰龕位,每個龕位由五萬元至二十萬元,平均呎價仲貴過豪宅,但市場反應熱烈,大批市民爭住認購,一度發生零星衝突,可見龕市非常暢旺。據業內人士表示,每年約有四萬人仙遊,就算加埋食環署今年落成嘅鑽石山靈灰安置所,都係得一萬八千多個龕位,輪候上「樓」條隊不知幾長,都唔知幾時輪得到。
既然咁多人向隅,當局點解仲坐視不理?嗰班行政會議成員係咪應該建議曾蔭權,立即推出八萬五建龕計劃,簡稱「陰宅八萬五」,希望在十年內,百分百先人可以有自置龕位。再唔係,就搞番個「居者有其龕」計劃,做唔到都唔緊要㗎,最多咪以後唔再提,咁就當唔存在㗎啦。
網友觀點...X)...
[能哥]
靈灰龕位都有人搶……咁遲啲係唔係行出街都要畀錢啊?
[CHE]
唔單止陰宅多人吼,以前凶宅送都唔要,但經濟不景氣,連凶宅都爭開有人爭,聽講好多印巴籍人士都好識貨。
[偉業]
唉,明知香港人執輸行頭慘過敗家㗎啦,叫人排咗隊又突然改變遊戲規則做抽籤,唔暴動都偷笑啦!
[波姐]
搶生搶死先搶到,唔通真係等到就嚟死先有?
阿豪觀點
政府龕位死都未輪到
做香港人真係悲哀,在生時搵唔到錢,要做冇殼蝸牛,好嘞,死咗嘞,以為可以抖吓啦,點知原來「陰宅」一樣咁搶手,早排有團體推售一千個靈灰龕位,墟冚囉,即刻引來排隊搶購熱潮。原來排政府龕位竟然分分鐘要成六年咁耐,真係唔爭崩頭就有鬼咯。就算我今日開始排,都唔可以確保我有生之年真係排到個龕位喎……
你知啦,一個人冇地方落腳,自不然要四圍騰打發時間㗎嘛,第時我喺下面要請願搵個對口單位,咁我應該搵下面嘅「房屋局」呀,抑或搵陽間嘅食環署呢?真係愈諗愈驚。下面通貨膨脹咁厲害,郁吓使錢都幾千萬幾千萬上落,卓署長麻煩做吓好心,等我第時有個安樂窩呀!
網友觀點...X)...
[匿名]
見到啲阿婆排咁耐隊都買唔到位,真係好陰功,死去嘅親人見到都唔安樂啦,政府又唔做嘢,得咁少龕位提供!
[神婆]
唔講得笑,入定幾間喺手,有得炒呀!係嘞,順祝你哋個blog好似啲陰宅咁受歡迎,哈哈!!
[盧海鵬開咪]
有冇搞錯?老人院舍分分鐘排到死都冇得入住,原來連骨灰龕位又話要排,咁做人仲有咩意思呀?
[廖尚恆]
「陰宅」豆腐膶咁細都賣成萬萬聲,咪仲貴過啲豪宅?小市民點負擔得起呀?