早前都講過受廣深港高速鐵路工程影響嘅石崗菜園村村民，企硬不遷不拆，早前透過新界鄉議局邀請運輸及房屋局局長Eva鄭汝樺落村交代事件，仲話煲定百花蛇舌草畀Eva清熱解毒。Eva日前喺日本北海道度假返港後，已即時聯絡菜園村代表，相約今個月內再落村交代事件，據聞佢只係講道理迎戰，一切搬遷同賠償安排會按既定程序處理。
日前忽然傳出政府有意物色八鄉七星崗村土地，畀菜園村村民延續農耕生活，傳聞係真係假仍就有待查證。但鄉議局主席劉皇發尋日出席一個活動時話，七星崗村土地涉及私人業權，即使菜園村村民願意搬到該地定居，都要向相關業權人購買土地業權，無論點都好，佢有信心菜園村遷拆問題一定能夠妥善解決。