工聯會嘅立法會舊組合「福祿壽」，除咗因為佢哋成日同煲呔曾頂到行，成為建制派陣營奇葩外，就因為嫻姐火爆、鄺大狀有法律專業背景、王國興棱角突出，各有鮮明形象，但今屆工聯會四子審視過去一年表現，論聲勢，論光芒，更加有少少畀「福祿壽」比下去嘅感覺。
身為工聯會立法會黨團召集人嘅KK黃國健話最近四人曾腦震盪，終於敲定分工角色，希望未來一年借樹立鮮明形象，提高提知度。
按分工部署，以後由葉偉明專門處理勞資糾紛，好似最近領匯變相炒外判工，就交晒畀佢做獨腳戲；潘佩璆就要做公務員問題專家；王國興專注基層民生、基建同整體勞工市場情況，延續其「建制派長毛」形象；而身兼港區全國人大嘅KK就負責政治層面議題，例如政改、政黨合作同特區管治呢堆棘手問題。咁工聯四子以後就各有品牌形象嘞。