兩大熱門候選人黃友嘉同呂明華把握機會「拉票」，鬥到難分難解。廠商會元老級人馬陳永棋公開力撐黃友嘉「係合適會長人選」，仲讚佢年輕有為、有魄力，而且年齡啱啱好。咁講法，莫非暗示年屆七十嘅呂明華年紀大咗啲？問黃友嘉係咪勝券在握，佢話唔想講選舉嘢，但提起家人就笑逐顏開，話暑假期間送細女入讀美國華盛頓大學，大女亦於早前考入美國加州大學主修生物系，兩位千金相繼出國讀書，好唔捨得，所以會全身投入做公職，等自己唔使心掛掛。