經過一年嘅實戰，立法會啲新丁議員都係時間要自我檢討吓，好似有「五散人」之稱嘅功能組別議員都唔例外。
雖然五散人過去喺議事廳對政府嘅態度唔係馴若綿羊，但周不時搞到政府估佢哋唔到，間中仲殺政府一個措手不及，總結表現：立場唔夠鮮明。點解？「IT豪」譚偉豪分析，因為佢哋唔夠惡喎！
咁點先可確立鮮明形象呢？IT豪話要主動出擊批評政府不當嘅施政。換言之，即係要搵啲議題出嚟批評政府，等政府主動去修改啲政策。咁咪即係變身做大鱷猛噬政府囉，咁就夠惡嘞！之不過，再換個角度嚟睇，佢哋咪好似學泛民主派咁，鬧政府博攞分囉！
IT豪仲話心目中已有議題去炮轟政府，就係人才政策，因為外國引入人才係着重專業同投資，所謂嘅投資係開設公司，而唔係好似香港咁引入資金買物業，咁只係益到地產商，仲會谷高樓價，累咗啲中小企，遲啲佢會同其他盟友傾吓其他議題添。咦！咁咪即係儲定彈藥向政府發炮囉！又睇吓政府點擋？