港大上至學院前院長，下至莘莘學子，不約而同牽涉刑事罪行，可謂黑氣沖天，港大百年崇高學術地位蒙上陰影，呢個都算係徐立之執掌港大七年以嚟嘅最大挑戰。徐校長係人類基因研究權威，但係港大師生犯罪，不存在人類遺傳因素，徐校長空有一身學術武功，一樣無符。唔通真係要用碌柚葉洗吓啲衰氣？

徐立之尋日出席鳳凰午宴時，被記者問起港大連串負面消息時面帶無奈，諗咗一陣，只係拋低一句：「都係唔好彩啦！」記者見佢冇乜心機，平日嘅燦爛笑容被陰霾掩蓋，於是安慰佢，話最緊要港大保持有良好學習環境畀學生啫，徐立之聽後，以「哈哈哈」三下笑聲回應，笑聲聽落飽含苦澀，無奈心情，表露無遺。

梁卓偉替林兆鑫可惜

○三年沙士疫潮爆發，港大實驗室率先確認冠狀病毒，徐立之被視為「幕後總指揮」，今次又睇吓徐校長點樣運籌帷幄，挽救今次港大醜聞危機！

徐立之作為港大校長，唔多想提起林兆鑫單案可以理解，而作為林兆鑫前下屬嘅食物及衞生局副局長梁卓偉，尋日喺大氣電波講起呢位前上司亦都點到即止，佢好感嘆咁話：「作為一個醫生，無論曾經係上司定同事都好，有咁嘅結果都係好可惜。」梁卓偉認為林兆鑫已經承擔法律責任，希望事件就此告一段落咁話。

梁卓偉都算厚道，冇向林兆鑫落井下石，但換另一個角度講，佢咁做等如幫緊港大，如果佢鬧多兩句，港大肯定仲傷。