其實都冇乜值得嘩然，慢慢就會習慣，好似豬流感襲港沒多久就令全港小學提早停課放悠長暑假，如今流感高峰期，日日三、四百宗，死亡人數亦有上升之勢，學生卻在豬流感四面埋伏下勇敢復課！身為香港市民，有一種好強烈的對比感覺，一如香港的貧富兩極化！

政府施政飄忽有如迷蹤拳，讓你無從揣測。好像一些反智的投訴，如某G模的瘦身廣告，又不是看了就死人冧樓，卻處理得特別快；反之，你要割條盲腸，排得期來，分分鐘已活化成生腸！一九一四年，畫家劉海粟在自己創辦的上海美專，破天荒地開設了人體寫生課，聘請男女裸體模特，當時被視為驚世駭俗，大師更被打成「文妖」！如今，學素描嘅都公認佢係先知！鬼咩！大衞雕像嘅何B仔都話色情，點都要畀條Under佢着才放心，咁嘅思維，怎培養到一流嘅創意人才及藝術家啊！

然而，應急嘅就唔急，好似差人爆錯屋打錯人，衰咗卻遲遲未見道歉。又譬如有上蓋公共運輸設施禁煙，但仍見市民大剌剌吞雲吐霧。

據說，經濟學者的迷惘之一是：你可以弄清楚整個社會、整個國家，甚至整個世界的財經現象，但是你永遠搞不清老婆進門時會帶甚麼商品回來。而我們的迷惘，是永遠搞不清特區政府明日會畀乜嘢娛樂我哋。