醒目，一聽就知太一叮講緊乜。冇錯，就係平機會主席個位嘞。政府尋日登廣告公開招聘平機會主席，基本薪酬二十萬零二千蚊，任期三年，要求至少十五年公共行政經驗，應聘者要「持正不阿、具出色的領導才能、行政技巧及成熟品格」。

咦，聽落同仲坐緊主席位嘅鄧爾邦所作所為，完全唔係嗰回事噃。話明「筍工」，有乜着數梗唔寫出嚟啦，貪馨香咩。嗱，等太一叮話你知有幾筍，聽過之後，包保應徵者爭崩頭。

係人都知平機會一向洗腳唔抹腳，係出晒名嘅大花筒。尤其係主席鄧爾邦，為所欲為，直頭係隻手遮天嘅山寨王。人工同副局政助嗰班政治新貴有得揮，維護公平公正唔見佢做過幾多，至叻就係攞阿公着數。

鄧爾邦成日借頭借路周圍飛，連九唔搭八嘅非洲人權會議，佢都去湊吓熱鬧，話就話公幹，其實係用公帑免費遊埠。呢個「離岸主席」從來唔執輸，有便宜攞到盡。為咗接受人哋免費旅遊款待，特登提早行程；博大懵自行將經濟客位升級做商務客位；住酒店普通客房嫌唔夠豪，要住「大使套房」；仲有本事用公帑幫自己購買「超豪」人壽保險添。

叮！對鄧爾邦嚟講，亂Fing公帑不過係碎料咋。佢最大特點就係面皮厚過犀牛皮，審計署踢爆一單單損公肥私嘅醜聞，佢無動於衷；立法會政府帳目委員會開到聲話「極度遺憾」，佢一樣好似借咗聾耳陳隻耳咁，當聽唔到。

衰完一鑊又一鑊，市民早就要求鄧爾邦引咎辭職，佢居然使出「賴皮忍功」死撐，賴喺度唔走。唔通鄧爾邦有心痛改前非，將功贖罪？錯！原來佢只要硬住頭皮唔怕瘀，撐到明年一月合約屆滿，就可以攞過百萬元約滿酬金。搞嚟搞去，原來又係想攞着數。

叮！差啲唔記得仲有一樣着數。政府話，平機會行政混亂同大花筒，係因為主席集大權於一身，遲啲會搵多個行政總裁喎。呢鋪認真筍咯，有嘢畀晒行政總裁做，大把時間學鄧爾邦咁周圍去，閃得就閃，黐得就黐，面對批評詐傻扮懵。總之無驚無險，又到終點，到時又可以淨袋百幾萬約滿酬金嘞。

叮佢個鎯鎯！平機會主席呢份超級筍工，對納稅人係超級搵笨，使咁多錢養個閒人，無所事事不特止，仲要添煩添亂。查實，呢啲殖民政府留低嘅政治花瓶，再放喺度都只會漚臭養蚊，盞累人累物。政府應該全面徹底整頓平機會，而唔係齋換個主席，與其係咁，不如趁鄧爾邦收皮嘅機會，將平機會摺埋好過啦！