嚇走報案人慳番啖氣
警方口供紙隨街扔,其實使乜大驚小怪吖,呢個可能係警方高層見依家啲前線人員,唔係去佛堂蛇王打牙骹就係作反要求加人工,好少真正去撲滅罪行。於是乎,就想出咗呢個非常有創意嘅方法,可以唔使太多人力物力,即刻可以收到好大嘅阻嚇作用。你知啦,香港警察唔可以好似內地公安咁,搞個公審會遊街示眾,於是佢哋詐詐諦諦將啲口供紙亂咁丟,睇吓邊個敢入警署落口供!查實咁嘅陰招,吸血貴利王都成日用,佢哋通街張貼尋人海報,指名道姓寫明「XXX」欠債唔還,男嘅一定職業老千,女嘅亦絕對非妓女莫屬,擺明洩露人哋私隱,又唔見個人私隱專員捉一兩個嚟祭旗?
阿豪觀點
增聘私隱安全主任
為堵塞警方洩密漏洞,強烈建議警方增聘多名「私隱安全主任」。為表達誠意,豪伯連招聘廣告都幫警隊諗埋:
警隊誠聘私隱安全主任
學歷、身高:不限
主要職責:巡查全港各大小垃圾收集站以及小巴等公共交通工具,如發現包括口供紙等機密文件,立即交回總部。
薪金:參考食環署街道清潔工人或小巴司機水平,視乎被編派的區域而定。
其實上述講法都係講笑。警隊要從根本上杜絕洩密事件,應將所有機密文件直接以廣告形式登喺報章雜誌,到時自然可以達到「本來無一『密』,何處惹塵埃」的最高境界啦。善哉善哉!
網友觀點......
小不點
警察又洩口供紙,醫院又唔見USB手指,鬼唔望將私隱專員啲私生活都揚埋出嚟。
CHE
呢班差人真係冇用,成日掛住加人工,本分工作又唔見做好,納稅人嘅血汗錢交得好冤枉呀!
Lavina
如果有G模嘅口供紙就好囉,我真係好想知道佢哋到底有冇……
MM
今時今日嘅警察水準好低,魔警淫警出齊晒,開幾槍都打唔中匪徒,將口供紙亂丟有乜奇啫。
Sue
警務處永遠都唔識吸取教訓,將人哋啲口供、資料同私隱亂掉,以後叫你點安心去報警呀~~~
燉緊臣
同意樓上所講,可能要到一哥自己私隱外洩先至知驚!
Cyrus
依家去警署報警,就算唔係資料外洩,都隨時在口供室畀警察強姦~~
尖子
好簡單啫,又花公帑再請人負責警隊的資訊安全咪得囉!