長實集團主席李嘉誠做生意叻就唔在講，佢大力支持慈善同教育事業亦廣為人知，做得首位以佢命名嘅教授席教授，來頭自然有番咁上下，佢就係攞過諾貝爾和平獎嘅前聯合國秘書長安南喇！
誠哥向來大力支持教育工作，除咗本地及內地嘅教育機構，唔少海外著名學府都有受惠，佢旗下嘅李嘉誠基金會及長實和黃，前年就聯手捐咗一億元坡紙（約五億三千萬港元）畀新加坡國立大學李光耀公共政策學院，支持佢哋推行多項教育活動，包括設立以誠哥命名嘅李嘉誠教授席同每年資助超過四十個碩士生嘅獎學金，希望喺亞洲區內栽培新一代年輕領袖及決策者。
該學院日前宣布委任安南出任第一位李嘉誠教授席教授，由明年三月起生效。安南九七年起出任聯合國秘書長，○六年光榮卸任，○一年仲同聯合國一齊獲頒諾貝爾和平獎。