雖然政務官係特區政府嘅中堅隊伍，但佢哋對國情有幾多認識，大家都有目共睹，「煲冬瓜」水平更令人不忍卒睹，不時搞出笑話，呢種情況同香港回歸多年嘅政治形勢完全脫節。公務員急須惡補國情教育已經係不爭事實，而港澳公務員培訓中心嘅誕生正好反映咗呢個情況。
擬建嘅港澳公務員培訓中心位於北京國家行政學院嘅北面，有學院管理層向最近上去讀國情「雞精班」嘅香港社團核心透露，財政部已批咗款落嚟，但不足以支持整個項目嘅經費，相當部分要揼港澳大孖沙心口籌番嚟。邊個大孖沙咁疏爽呢？學院管理層冇透露，但對香港公務員加強國情教育，呢項回歸工程意義重大，相信只要北京方面開到聲，都冇乜邊個會拒絕。