近排扮木村拓哉噴止汗劑廣告嘅「扮嘢始祖」盧海鵬，喺網上嘅點擊率極高，而佢喺一個電視節目中飾演「教肉局局長孫明洋」，模仿教育局局長孫明揚可謂相當神似。
尋日喺一個場合遇到孫公，佢話都睇過一集，仲話：「咪『六四二十四』嗰集囉！」原來嗰集係講Ａ貨孫公開記招，有記者問到有關六四問題，Ａ貨孫公就氣若游絲咁話：「六四二十四，今日已經六月七日，你咁遲先至問，出年再問過啦！」鵬哥不但學足孫公老油條表現，仲學埋高官答問題慣性耍太極嘅伎倆。
咁鵬哥扮得似唔似？孫公話冇乜意見，但就話最緊要係老婆唔好認錯盧海鵬做老公就得嘞，認錯咗A貨老公就唔好啦！乜唔係最緊要孫仔唔好認錯外公咩？孫公一聽到孫仔兩個字，即時笑逐顏開。