呢排煲呔曾為下年度嘅施政報告諮詢緊唔同界別，當中包括咗立法會議員。但佢唔知抽起邊條筋，整咗個不明文規定，當一個政團湊唔夠四個人就要打散嚟見，仲亂溝一通，搞到一鑊泡，令富貴黨變成受害者。
眾所周知，富貴黨經歷家變後，立法會議員數目擘半，得番三個，由大黨變細黨已經夠慘，點知好戲在後頭。
煲呔曾定咗三個唔同日子嚟見班湊唔夠數嘅議員，富貴黨主席Miriam劉健儀只係得一日喺香港，等於冇得揀。偏偏嗰日報咗名嘅有職工盟李卓人、街工梁耀忠，仲有民協嘅馮檢基同張國柱等，工商黨同草根勞工團體同場咪盞水溝油，煲呔曾呢啲咁嘅政治「溝ture」（溝嘢文化），搞到搭枱嘅富貴黨好冇癮。
可能知道溝出禍，聽聞煲呔曾打算喺諮詢會後拿拿臨約番富貴黨去禮賓府食飯補鑊。早知今日何必當初？其實呢條不成文規定喺上屆已出事，有三個議席嘅工聯會嘈到拆天，今屆無名無分嘅五散人亦嘈埋一份，但煲呔始終都唔肯改，呢啲唔係搵石頭砸自己隻腳係乜？