IQ博士素來係「我行我素」，內會、財委會同其他事務委員會嘅出席率都係最低嗰幾個，已經惹嚟唔少監察議員表現組織嘅非議，仲鬧佢係大懶蛇，但IQ博士呢種依然故我，連中總元老都睇唔過眼。

有中總元老話，IQ博士淨係做好立法會政府帳目委員會主席份工根本唔足夠，須知議事廳審議好多涉及商界利益嘅問題，尤其係人力事務委員會就更加應該坐落去，偏偏IQ博士就冇。

正如人力事務委員會早前討論破產欠薪保障基金有關擴大至員工過去一年未放取嘅年假薪酬，本來破欠基金同勞顧會都過晒，竟然畀勞工界嘅議員要加碼彈番轉頭，如果多啲商界議員喺委員會，點都可以撐住先。

睇實最低工資草案

聽聞勞顧會就企硬唔會再傾呢單嘢，之後事態發展唔知點，但月底有關最低工資嘅條例草案委員會開波，商界同勞工界又再開戰，嗰名中總元老講到要篤住IQ博士做嘢，除咗要佢坐足會外，最重要就係篤住佢㩒掣，阻止職工盟李卓人提出由立法會審議最低工資水平咁話。

中總元老咁做，都係要IQ博士做好把關嘅工作，但點把關吖，睇番草案委員會嘅名單，有三十個委員，商界代表都疊晒友落去，好似富貴黨、經濟動力咁，但五大商會當中，就只有中總冇人，即係IQ博士冇入會。

咁都得？IQ博士係咪真係咁老定呀？事前喺委員會唔箍住，萬一畀勞工界攝到位，咁商界咪蝕晒章？若果去到最後草案交上立法會大會二、三讀先出手就真係蛇到死啦！中總元老話要篤住IQ博士做嘢同㩒掣，咁唔該佢篤住IQ博士去補飛，加番入草案委員會先嘞！