呢首歌相信好多人都聽過,不過比起依家好多跨境學童,歌詞中嗰位小兒郎認真幸福。因為呢班跨境學童返學唔止要忍受太陽曬、風雨狂,仲要山長水遠由深圳過關嚟香港!
有學校踢爆警方靜雞雞取消部分跨境學童嘅禁區紙,有啲原本應該有酌情權嘅小五、小六學生,竟然不獲批羅湖道禁區紙,搞到哥哥姐姐唔可以照顧同行嘅弟弟妹妹跨境返學,都唔知點算好。
唔係啩,過關人頭湧湧,竟然要兄弟姊妹分開返學?諗起都牙煙啦!試想想,大人過關都有機會前後腳失散啦,更何況係小朋友?佢哋咁細個,容乜易唔知畀人逼咗去邊,如果大吉利是唔見一個,試問呢班官僚點賠番仔女畀人!
事實上,近年返去深圳定居嘅港人愈來愈多,現時嘅跨境學童已增至約七千人。既然咁多小朋友每日要跨境返學,當局好應該推出配套措施,配合實際需要。最弊係當局一直闊佬懶理,拒絕增加羅湖道禁區紙配額不特止,仲打死唔肯加闊畀呢批學童過境嘅特別通道。
叮佢個鎯鎯,一講到要問責,政府部門又係例牌各說各話,互相推卸責任。據北區多名小學校長透露,政府部門同學校開會商討跨境學童安排時,周不時用各種理由做擋箭牌解釋減發羅湖道禁區紙配額嘅問題。
其實減發禁區紙嘅理由,只得兩個字,就係「卸膊」。幾個部門你卸畀我,我卸畀佢,總之就係冇人肯認頭。好似踢波咁,入境處一個大腳踢畀警方,話唔關通道嘅事,要問番負責簽發禁區通行證嘅警方至知。
警方又點接波呢?唔使擔心,佢哋一向腳法凌厲,球不着地話跨境返學安排係由教育局負責統籌,保安局及警方只係就教育局嘅審核及建議去簽發。
冇錯,警方個波的確交得好利落,但唔好睇小教育局呀,佢哋亦係卸膊勁旅,一於死撐到底,話當局沿用去年嘅簽發準則,新學年維持簽發羅湖道禁區通行證予入讀北區幼稚園及小一至小四跨境學童。
叮佢個鎯鎯,個個部門都唔關事,咁到底關邊個事吖?唔通關學生事?關家長事?關學校事?一直以來,唔少市民已不厭其煩提出簡化跨境學童嘅過境手續、增加跨境校巴配額,要實施呢啲建議根本毫無難度,只不過政府部門各自為政,翹埋手唔理之嘛。話時話,點解唔整個跨部門小組出嚟統領呢班散兵游勇呢?講到底,完全係特區政府不負責任,忽視跨境學童嘅過關問題,先至搞到亂晒龍。
新學年就快開學,跨境學童好快要背着書包回港上學堂,當局係咪唔見棺材唔流眼淚,要發生意外至知驚吖?叮!
