本文重點
版主感想
入地獄好過入警署
都唔知乜嘢世界,淫警竟然夠膽喺警署強暴少女,呢次連古龍都老貓燒鬚,原來最安全嘅地方先至係最危險,難怪老一輩成日話「生不入官門」啦,小白老弟認為,甚至係入地獄都好過入官門。
你摷吓古代恐怖熱線主持蒲松齡嗰本《聊齋誌異》,下面啲鬼卒最離譜嘅咪屈打成招囉,對於陽間嘅「冇紀律部隊」同行嚟講,簡直係小兒科到極啦。但係從來冇聽聞過竇娥同埋杜十娘兩位女士落到去,含冤受屈準備向閻羅王告狀嘅時候,有鬼卒夠膽死喺地府嘅認人房內搞佢哋,所以今次淫警之舉,可以講得上係奇聞中之奇聞,應該大書特書。
好嘞,如果真係唔好彩要報警,到底有乜自保方法呢?Hmm,諗咗好耐,得一個方法睇嚟最有效—就係唔好去報警。
網友回應......
珍妮花
咁危險,落口供一定死都唔入密閉房,或者要多幾個女警一齊先好跟入房。
May
阿媽睇完新聞都叫我哋唔好隨便入警署,有咩事打電話報警好過,出事嗰間警署一定唔入囉。
冰冰
依家連入警署都咁危險,真係唔知咩世界,惟有着得密實啲,包上包下,畫埋花臉,希望淫警打退堂鼓囉。
輝仔
警署要改裝為落地透明玻璃房啦,有咩一眼睇晒,咁市民先安心。
潔宜
如果真係要入警署,裝定樽噴霧式高鹽分嘅鹽水,遇到淫魔就噴佢對眼,仲唔彈開咩,嘿!
芬姐
帶埋防狼器至好入差館,唔係畀人溶咗都唔知咩事。
鳳凰
一於買多幾個防狼器跟身,噴霧加高頻響聲,仲唔嚇走淫警。權權管治底下,估唔到市民都要擔驚受怕對付警察,檢討吓啦。
月婷
女仔就最易啦,帶備指甲鉗、眉鉗、美容剪傍身,有咩事,用嚟鉗淫警,方便又就手。