新一屆立法會運作啱啱一年，議員已經搞咗四個公費外訪團，其中一個東歐三國超豪團，更出現議員爭崩頭報團嘅盛況，要用比例代表制再加抽籤先分得掂八個免費名額。不過英聯邦議會最近誠邀兩名香港立法會議員去考察，雖然都係去歐洲，但六十個議員竟然只得一人報名，真係好出奇。
呢個喺十一月中舉行嘅會議內容包括實地考察英國上下議院、歐盟議會同蘇格蘭地方議會嘅運作，包括政黨運作、政府管治、執政黨及反對黨角色等，範圍廣且有國際視野，參加者包食宿，議員來往香港機票又由立法會畀，可以話一個崩都唔使出。
可惜，上周二晚截止報名，只係得會計界陳茂波、保險界陳健波同金融服務界詹培忠三名獨立功能組別議員報咗名。陳健波同詹培忠都係因為手民之誤而報錯名，真正想去嘅只得陳茂波一個，即係仲有一個名額冇人吼。陳淑莊就話如果有位剩，會認真考慮重新報名。