電腦通訊節吸引唔少城中潮人撲機，今年當打嘅機係微型筆記型電腦（Netbook），尋日連身兼上市公司主席嘅資訊科技界立法會議員譚偉豪都貢去展場揀貨，佢有名IT豪，潮流電腦產品點少得佢嗰份，唔講唔知，IT豪個人已擁有四部電腦，方便佢喺任何時候、大部分地方都通訊無阻，尋日再買部Netbook，真係名副其實嘅一人五腦。
IT豪話，依家嗰四部電腦分別放置於立法會、公司辦公室及座駕，再買一部打算隨身用。佢話，每度地方放置一部電腦隨時候命，方便有需要時一定有電腦用喎，可能呢啲就係有錢人用電腦嘅方法。
講番佢尋日想添置嘅Netbook，啱啱推出時佢已經率先買咗一部試用，但後來嫌棄部機個螢幕太細，所以家吓決定再買過一部，佢仲教路，買Netbook最緊要係電池嘅續航能力，最起碼要用到四至五小時，如果唔係帶出街會成日無電。至於價錢方面，以五千蚊左右為最好。