立法會會計界前議員李家祥(Eric)冇做議員後,公職一樣冇少到,佢笑言家吓處於半退休狀態,繼早前參加橋牌賽後,佢日前又同太太喺中環撐枱腳,仲透露暑假啱啱去完意大利旅行,玩足十三日,遊歷名勝外,仲歎盡美食。
Eric同太太今次喺意大利自駕遊,揸住架車去勻羅馬、梵蒂岡、佛羅倫斯及威尼斯,十日足足揸咗二千公里,每日平均二百公里,最遠程係由中部開上東北部威尼斯。好難忘嘅就係意大利美食,Eric特別點名大讚佛羅倫斯嘅芝士分量十足,烤羊肉又好味。佢太太有乜收穫?李太含笑擰頭,Eric忍唔住篤爆佢,細細聲透露回程多咗兩個行李箱,言下之意唔使再講喇。