商務及經濟發展局副局長蘇錦樑（阿Greg）啱啱放完大假，去咗英國出席囝囝嘅大學畢業禮，尋日佢出席城市青年商會舉行嘅「創意創業大賞」頒獎禮，對其中一個婚紗設計嘅單位特別感興趣，仲講笑話可以幫囡囡睇定婚紗，唔通阿Greg咁快想做外父？
阿Greg尋日喺個婚紗設計嘅攤位前停低好耐，慢慢咁睇，問佢係咪想同太太再影過婚紗相？佢就話自己用唔着，不過可以幫兩個囡囡留意吓喎。阿Greg有兩個女，細女依家仲讀緊大學，大女就大學畢業咗兩三年，唔係咁快紅鸞星動啩？
講完婚紗後，佢又講番主辦團體推廣嘅創意，仲透露十幾年前佢做緊律師行時，法律界仲未流行用電腦，九成九資料都係手寫處理，非常費時失事，結果佢自創咗一套電腦程式畀公司應用，效果竟然好好。