朱經武月底便任滿，科大方面更已吹雞，喺十月舉行新校長同院系主任會議，就科大嘅新人事、新局面作深入交流。

朱經武被妻嘲「瘋了」

至於陳繁昌將來的工作，籌款或是最大考驗，事關當局早幾年實施大學籌款配對基金計劃，既能鼓勵學校籌款，又能間接增加資助，但個計劃今年二月屆滿後，迄今當局未宣布新猷。如果政府唔再推出類似計劃，各大院校將墮入籌幾多、使幾多嘅苦況，新當家想唔愁都難啦。

做咗八年零兩個月科大校長嘅朱經武尋日就喺一個電台節目中表示，自己當年由美國返嚟香港做科大校長，曾被妻子喻為「瘋了」；而科大董事局肯招納佢呢個人選，朱經武亦贈以一句「瘋了」，八年過去，朱經武話當年彼此「瘋了」嘅結果係「負負得正」，因為大家都肯冒險而擦出火花，並擦出一個雙方都認為滿意嘅結果。

至於校長嘅角色，朱經武就話自己好似「啦啦隊長」，為學生、學者提供良好環境，鼓勵佢哋做好科研與教學就係最大責任。最後，朱經武都鼓勵學生有夢想、有耐心地追求就可以產生不平凡，即係不平凡嘅人物、不平凡嘅機構同不平凡嘅社會。