吾友乃斯文人，平時俗語都唔會講多半句。譬如一齊在酒樓用膳，人有三急，佢會話：「我可唔可以去化妝間啊！」阿哥，你又唔係女人，化乜鬼妝啫？後來熟稔了，才知佢去小便。近來全城講驗尿，報紙講、電台講、電視講、家長講、學生講、校長講、社工講、校董講、主教講……香港夠烏煙瘴氣啦，如今還充溢着腥臊的尿餲味，難怪我那位斯文友狂呼：再咁講驗尿，我真係連呼吸都有困難，唔該借歪，我連方便都有問題，救命啊！
校園驗毒計劃，筆者斗膽講句，政府如一味好大喜功，樣樣攬上身，那肯定慘過畀蜂螫！勞而無功，花大錢冇成效，智者不為也。講真，話明係校園驗毒計劃，政府為何不信學校的校長、訓導主任、班主任、駐校社工，而要越俎代庖，由煲呔曾做驗毒大隊長？
打個譬喻，筆者婚姻觸礁，即使打上電台訴心聲，求黃大仙畀支好籤，找睇相佬指點迷津，可是，感情呢家嘢有苦自己知，解鈴還須繫鈴人，解我心中結化我肝裏愁的還是自己！校園驗毒亦然，校園的事校園解決。如今政府失驚無神大喝一聲：我來了！江湖上從此多事！不！從此多尿！不是嗎？連教育局副局長都話：我願意──驗尿！孫公你又豈能只顧微調？好歹整篤尿驗一驗趁吓墟嘛。
無論校園驗毒計劃是否成功，有一點必定要歸功政府，就係語言植根於生活，有生命力的語言，其民族總是活潑的。吾友斯文人一改常態，見到靚女就問：你今日驗咗尿未？對方如笑而不怒，斯文友心知又得米矣！