事關運輸署今年發出四百六十個教車師傅新牌，竟然吸引三萬三千宗申請，而運輸署採用抽籤形式，平均七十幾人先有一個有機會應考，真係抽中都要劏雞還神。

點解師傅牌要爭崩頭？經濟不景囉，搵食艱難囉，七年無發牌囉，仲有一個好關鍵嘅原因，就係運輸署訂嘅門檻好鬼低，只要持有相關車牌三年以上，五年內無試過危險駕駛撞死人同醉駕，任何人都可以參加抽獎，一牌在手，多條出路，今時今日逢海嘯，教車師傅已經成為理想職業。

至於抽考模式呢，以第二組嘅小巴及巴士師傅牌為例，雖然報嘅人有六千，但牌就只有五十五個咁大把，而運輸署會抽籤決定申請人嘅排列次序，先畀頭五十五人應考，假設嗰五十五人有五人肥佬，先輪到排五十六到六十嗰五個，餘此類推。運輸署話，用抽籤制度處理申請，可確保所有申請人都獲得公平對待。

到底抽籤考牌公唔公平？嗱，不妨咁講，如果你抽得中嘅，就梗係覺得公平啦，如果你抽唔中嘅，就梗係極極極之唔公平啦，而對於運輸署班官老爺嚟講，抽籤可以令佢處理最少考生，做少啲嘢，就梗係極極極之公平啦。

之不過，現任教車師傅就舉手反對喎，佢哋認為，師傅牌嘅申請要求過於寬鬆，驚有經驗不足嘅人符碌入行，出現「新牌師傅教新仔」嘅情形，佢哋建議當局統一牌照，要求師傅具備所有車種嘅教車牌先可以教車，確保佢哋認識所有車輛，提升教車質素。

到底老師傅嘅講法合唔合理？咁講啦，經驗唔一定等於實力，我哋唔排除有新牌高手嘅可能，之但係運輸署嘅抽籤模式，又確係靠彩數多過靠實力喎。開講都有話，名師出高徒，太一叮認為，家吓既有三萬幾人爭做師傅，最理想嘅做法就梗係全部考晒，然後擇優而任，就算唔得嘅，都起碼考多幾千人揀吓啦，點可以發幾個牌就抽幾個人嚟考，玩泥沙咩，叮！

更令人擔心嘅係，運輸署班友仔擺出一副懶得就懶嘅態度，到時都唔知佢點樣發出呢幾百個牌，究竟有冇把好個關，定係關人個關？你知啦，家陣香港幾乎日日車禍，甚至釀成奪命慘劇，駕駛態度不當係其中一個主因，而提升師傅水平，就係提升駕駛水平嘅最根本做法。

師傅攞牌靠彩數，學神上路無運行。太一叮鄭重警告運輸署班高官，一要審慎發出教車牌照，二要重新檢討考牌制度。再唔係，可以畀你第三個選擇──就係趁早執包袱走人，無謂白人工，叮！