版主有話說...m^o^m...

打擊索K冇阻嚇力

校園驗毒計劃最快十二月推出，畀咁多時間學生哥準備，佢哋實搵到應對方法，到時學生交出嘅尿液，寫包單一定冇事，因為佢哋都係拎屋企隻貓同埋樓下士多隻狗嘅樣本頂檔，如果咁都驗出，除非連貓狗都有索K習慣啦。

政府成日宣傳索K會搞到胃痛、肝功能失調之類嘅後遺症，基本上冇乜阻嚇力，學生哥上人體生物堂，只係講到「生殖」嗰章時會專心聽書，仲有時教番Miss轉頭，糾正上一輩嘅錯誤性觀念。其餘嘅課，唔係走堂就係索咗K攤喺個位度神遊太虛，邊度分得清五臟六腑邊度打邊度吖？

嗱，有個醫院聯網總監就捉到口靚仔心理嘞，佢引用臨床個案話索K會導致男士陰莖硬度不足，係男人都怕怕啦，如果佢能夠講埋索K會令美少女變晒飛機場，做唔成露暈娜，咁就更加功德無量。

網友回應...X）...

[堯]

明知係冇用㗎，度呢條橋出嚟嗰個真係人頭豬腦，佢哋應該驗吓個腦就真。

[史歷奇]

依家啲細路十個有九個食，邊驗得咁多，驗唔到猶自可，如果真係咁神勇全部驗出九成學生都索咗K，唔通將學校封咗佢咩？

[tiramizu]

都唔知邊個諗出嚟，連小學生都笑佢傻仔，學生打死都唔驗，你吹得佢脹咩，驗咪最多畀童子尿你驗囉。

[阿華]

如果學校九成都索K，學校為保校譽，可能造數都唔定。

[C+偵探]

實做手腳啦，唔通你睇住佢屙咩，一句侵犯私隱都你怕啦。權權都搵來搞嘅，呢單嘢實又爛尾收場，又係一場政治show，做都做得醒啲吖，次次都捉蟲。

[冒名]

嘥氣啦，叫警察捉晒班賣K嘅壞蛋好過啦！