點解啲學生要吸毒？索完K後感覺係點、有幾high、幾迷幻就唔係人人都知，立法會議員李慧琼都係矇查查，佢話K仔未索過，所以唔理解班學生哥點解會咁沉迷，索到不能自拔、身體受損都在所不惜。
雖然冇索過K，但佢亦有high爆嘅經驗。話說有次患咗重感冒，佢食咗粒止痛藥之後成個人就暈暈哋high high哋咁，唔知自己做緊啲乜嘢，過咗冇耐仲不省人事添！佢就諗，唔通索完K嘅感覺係咁上下？
嘩！食止痛藥都high，唔係呀？好彩佢冇講邊隻牌子啫，否則啲濫藥學生冇錢買K仔，轉去買止痛藥嚟頂癮，又或者用嚟避開校本驗毒計劃咪弊？
佢仲自爆以前有個朋友喺美國返嚟，知道佢冇試過索K就同佢講：「嗱！未試過就真係要試吓喇！」好彩佢最後把持得住冇受引誘，先保持到清白之身啫！
講番校本驗毒計劃，佢作為家長表示會支持，事關毒品禍害真係害人不淺，但係政府就要做好配套，最好每間學校有兩個社工，否則驗到一大班學生有索K都冇人跟進就盞搞。